Çavkaniyeke dîplomatîk a Fransayê li ser danûstandinên di navbera Hêzên Sûriyeya Demokratîk (HSD) û Hikûmeta Sûriyeyê de ji Rûdawê re got, "Ew hêvî dikin ku diyaloga HSD û Hikûmeta Sûriyeyê berdewam bike."

Çavkanyiyê  her wiha amaje pê kir ku pêwîst e hikûmeta nû ya Sûriyeyê ji bo dabînkirina pêdiviyên gelê welatê xwe kar bike.

Çavkaniya dîplomatîk a Fransayê derbarê pêkanîna hikûmeta nû ya Sûriyeyê de ji Tora Medyayî ya Rûdawê regot:

"Pêwîst e niha hikûmeta nû wan sozên ku ji aliyê berpirsên desthilata demkî ya Sûriyeyê ve hatine dayîn bi cih bîne.

Her wiha çavkaniyê diyar kir ku pêwîst e hikûmet di asta "hêvî û pêdiviyên gelê Sûriyeyê" de be.

29ê Adara 2025an, Serokê desthilata demkî ya Sûriyeyê Ehmed Şer hikûmeta nû ya welatê xwe ragihand.

Hikûmet ji 23 wezaretan pêk tê û hinek ji pêkhateyên welat, ji wan Kurd û Durz tê de beşdar nînin.

Çavkaniya dîplomatîk a Fransayê got: "Em hêvî dikin ku ew diyaloga ku roja 10ê Adarê di navbera desthilata demkî û Hêzên Sûriyeya Demokratîk de dest pê kir, berdewam bike."

Roja 10ê Adara 2025an, Fermandarê Giştî yê Hêzên Sûriyeya Demokratîk Mezlûm Ebdî, û Serokkomarê Sûriyeyê Ehmed Şer ji bo qonaxa demkî peymanek îmze kir.

Peyman ji 8 xalan pêk tê. Li gorî peymanê, şer li seranserê Sûriyeyê dê raweste û HSD dibe beşek ji dezgeha parastinê ya dewleta Sûriyeyê.

Di peymanê de hatiye: "Civaka Kurd civakeke resen e li dewleta Sûriyeyê û dewleta Sûriyeyê garantiya mafê welatîbûnê dike û hemû mafên destûrî jê re dabîn dike."

Çavkaniya dîplomatîk a Fransî amaje bi wê yekê jî kir: "Fransa pabendbûna xwe bi bicihkirina qonaxeke demkî ya siyasî ya giştgir û aştiyane ku nûnertiya hemû pêkhateyên civaka Sûriyeyê bike û garantiya maf û parastina hemû Sûriyeyiyan bêyî ku ol, netewe û zayend were hesabkirin, dubare dike.

Fransa di wê hewldanê de ji bo piştgirîkirina desthilata Sûriyeyê amade ye."

8ê Kanûna Pêşîn a 2024an, komên çekdar ên wê demê yên Sûriyeyê bı peşengiya Heyeta Tehrîr Şamê desthilata Esed rûxand.