Neteweyên Yekbûyî (NY) piştgirî dide Hikûmeta nû ya Sûriyeyê dike lê bi şert û mercên wekî destûra bingehîn a giştî û hilbijartinek dadmend û azad ve girê dide.

Him Sekreterê Giştî yê NYyê û him jî Serokê Encûmena Asayîşê yê Fransayê ragihand ku ew pêşwaziya hikûmeta nû ya Sûriyeyê dikin lê divê rêveberiya demkî gotin û sozên ku dane bi cîh bîne û ji wan daxwaz kirine ku mafên pêkhateyan werin parastin.

Berdevkê Sekreterê Giştî yê Neteweyên Yekbûyî Stephane Dujarric got:

Li ser bipêşketinên dawîn yên li Sûriyeyê, ez dikarim ji we re bibêjim ku em piştgiriyê didin eşkerekirina kabîneya nû û berfireh a li Sûriyeyê di dawiya hefteyê de ku hate ragihandin.

Şandeyê me yê taybet ji bo Sûriyeyê, Geir Pedersen, careke din piştrast dike ku giringiya veguhestina siyasî ya berfireh rê dide gelê Sûriyeyê ku serweriya xwe dîsa ava bikin û bikaribin nakokiyên xwe yên berdewam çareser bikin û rê dide wan da ku daxwazên xwe yên mafî pêk bînin û herwiha alîkarî ji bo aramiya herêmê jî dike."

Di vî warî de, Berdevkê Sekreterê Giştî yê NYyê di press konferansê de ji rojnamegeran re got ku Şandeyê Taybet ê NYyê yê ji bo Sûriyeyê Geir Pedersen, teşwîq dike ku her yek ji wan hewildanên berdewam ên desthilatdarên demkî divê ji bo veguhestineke pêbawer, berfireh û domdar bibe, him di warê rêvebirinê de û her weha di warê gavên pêşerojê yên veguhêz de.

Stephane Dujarric wiha anî ziman: "Di nav de avakirina encûmena yasadanînê de, komîteyek ji bo nivîsandina destûrê bê avakirin û her wiha amadekarî ji bo hilbijartinên azad û dadmend li gorî standardên navneteweyî yên herî bilind û li gorî pirensîbên sereke yên biryara Encûmena Asayîşê ya 2254an bên kirin."

Di derbarê hikûmeta nû de Serokê Encûmena Asayîşê Fransayê jî li ser pirsa me ya wek Tora Medyayî ya Rûdawê bersiv da û got ku Encûmena Asayîşê bi awayekî eşkere nêrînên xwe li ser parastin û mafên pêkhateyan zelal kiriye ji hikûmeta demkî re.

Li ser pirsa nûçegihanê Rûdawê Sînan Tuncdemîr "Sûriyeyê di dawiya hefteyê de hikûmeteke nû ava kir û kêmnetew wekî Kurd, Durzî û Elewî nîgeran in ku mafên wan neyên parastin. Wekî Serokê Encûmena Asayîşê gelo Encûmena Asayîşê çi dikare bike ku mafên hemû pêkhateyan dê li Sûriyeyê bêne parastin? Ji bilî vê hûn dikarin hinekî jî behsa pozîsyon û rola Fransayê ya li Sûriyeyê ji bo parastina mafên pêkhateyan bi taybetî mafên Kurdan bikin?"

Nûnerê Fransayê yê NYyê û Serokê Encûmena Asayîşê Jerome Bonnafont wiha got:

"Encûmena Asayîşê ji ber tundûtûjiyê bi zelalî nêrîna xwe diyar kir û me daxwaz kir ku desthilatên Sûriyeyî wekî ku ji wan tê xwestin tev bigerin, ango rêzgirtina ji xelkê sivîl re û rêzgirtina ji kêmnetewan re nîşan bidin

Ji bo hikûmeta veguhêz jî destûrek nû heye. Her wiha hikûmeteke veguhêz heye û di wê hikûmetê de kesên ji grûpên cuda hene û vê dawiyê Fransayê jî nêrîna xwe li ser vê yekê eşkere kir.

Ji bo me eşkere ye ku ji bo Sûriye vegereke teqez a aştiyê bibîne û ji bo ku bikaribe xwe wekî Sûriyeyeke nû ava bike, divê rêz li pêkhateyên xwe bigire.

Divê di nav de her kes cih bigre û divê xwe ji belaya terorê rizgar bike û bi cîranên xwe re di nav aştiyê de bijî.

Divê em ji bo wan hemû armancan bixebitin, û divê Encûmena Asayîşê jî pabend be bi piştgirî kirina hewlên ku têne kirin û piştgiriya hikûmeta veguhêz a Sûriyeyê di tiştê ku wan gotiye ew dixwazin bikin."

Neteweyên Yekbûyî û di nav de Sekreterê Giştî û Encûmena Asayîşê gavên nû li Sûriyeyê tên avêtin erênî dibînin lê ev jî destnîşan dikin ku divê hikûmeta demkî zêdetir gavan biavêje ji bo ewlehî, parastin û mafên pêkhateyan.

Her wiha Nûnerê Taybet yê NYy dê di van rojan de carek edin biçe Sûriyeyê û wê pêkhateyan û aktorên Sûriyeyê re civînan li dar bixe û ser de jî raportek nû wê ji Encûmena Asayîşê re ragihîne.